Legekontoret ligg sentralt i Øvre Årdal med helsestasjon og jordmor i same bygg.  Legekontoret er nyrenovert, velutstyrt og har svært kompetente helsesekretærar, bioingeniør og sjukepleiarar i staben. Kontoret har idag 6 fastlegeheimlar og tilknytt turnuslege.

Legar ved Årdal Legekontor er ein del av legevaktsamarbeidet som er organisert gjennom Sogn lokalmedisinske senter, lokalisert ved Lærdal Sjukehus.

Når du reiser innover langs Sognefjorden og trur du snart ikkje kan koma lengre, der finn du Årdal nasjonalparkkommune.
Med mektig, urørt natur og kort veg til Jotunheimen nasjonalpark ligg Årdal mellom høge, bratte fjell og djupe dalar, og er antakeleg Noreg sin mest spanande og ukjende boltreplass for friluftslivinteresserte.

Kommunen har to tettstader, Årdalstangen og Øvre Årdal, med omlag 5170 innbyggjarar. Tettstadane er omkransa av fleire dalar: Naddvik, Nundalen, indre og ytre Ofredal, Seimsdal, Fardalen og Utladalen.
Årdal er vertskap for fleire populære festivalar, både musikk- og friluftslivretta, som trekkjer til seg folk frå fjern og nær.

Teknologi- og innovasjonskommunen Årdal er framtidsretta og har eit stort fokus på innbyggjarane sine, på miljøet og på skaping av nye arbeidsplassar. Å arbeide i Årdal byr på inkludering og varierte stillingar, der arbeidsstadane er dynamiske og tilpassingsdyktige med eit stort fokus på trivsel og mangfald.

Her finn ein alt frå lokale til internasjonale bedrifter som famnar om ny innovasjon og moderne teknologi, samt mange spanande satsingsmoglegheiter innan reiselivsnæringa for den eventyrlystne og ambisiøse.
 
Kommunen byr på mange gode og varierte servicetilbod, eit fengjande kulturliv og eit breitt utval av fritidsorganiserte idrettar. Her kan ein finne daglege friluftstilbod for store og små, og det er korte avstandar til skular og barnehagar, idrettsanlegg, skianlegg, badeanlegg og dagsturhytter. I tillegg har Årdal eit stort lokalengasjement innan fleire sektorar med stor bidragslyst frå innbyggjarar i alle aldrar.

I Årdal satsar ein stort på framtida med nettopp lokalengasjement i ryggen, og med nye teknologiinvesteringar som hevdar seg i verdstoppen. No er me på utkikk etter nettopp deg som ynskjer å satse, dele kunnskap og å bidra til samfunnet for ei god framtid for deg sjølv og sambygdingane dine.

1. Topptur etter jobb? Ja takk!
2. Korte avstandar til barnehagar, skular, jobb og fritidstilbod.
3. Jotunheimen nasjonalpark som næraste nabo.
4. Aktive miljø innan idrett og friluftsliv, musikk og frivillige organisasjonar.
5. Spanande og innovativt teknologimiljø.
6. Gunstige prisar på bustadar.
7. Plassert midt mellom Bergen, Trondheim og Oslo.
8. Sterkt lokalt engasjement og dugnadsand.
9. Internasjonale arbeidsmiljø.
10. Gründerspire? Gode idear får god støtte frå dyktige hjelpeapparat.